وقفة مصرية

1.7.08 |


بقلم فانتازيا

يا عم هو حد اتحرك؟ ما أحنا مزروعين مكانا وواقفين أهوه! حد شافنا اتعتعنا؟ والنبي حد شافنا بنشاور عقلنا نتحرك ولا حاجة؟ ما أحنا زي ما أحنا أهوه.. نقف إيه أكتر من كدة؟ نقف على رجل واحدة؟

من أغبى إعلانات التوعية اللي اتحفنا بيها التليفزيون المصري في تاريخه! إعلان مستفز وغبي وعبارة عن عملية نصب على مموله وعلى المشاهدين الغلابة. تقريبا شركة الاعلانات عندها أهداف خبيثة من ورا استهبال الزبون الحكومي اللي اتفق معاهم ع الحملة المهببة دي؟ كانت مالها اعلانات "انظر حولك" مش فاهمة؟ جاتها نيلة اللي عايزة خلف

قال
وقفة يا اسطى
وقفة يا آنسة
وقفة يا بلدينا
وقفة يا دكتور
الله يوقف حالك يا بعيد
ماهي واقفة ومتحنطة خلقة بقالها زمن
هي ناقصة وقوف؟ هتحولوا البلد لمتحف شمع؟

المشكلة السكانية في مصر عمرها ما هتتحل بالوقوف. لو كان ع الوقوف كان زماننا انقرضنا! أمال الصين والهند يعملوا إيه؟ دول على كدة عايزين الحرق مش عايزين وقفة

عمركم شوفتوا أي بلد في العالم التالت ضاربها الفقر والتخلف والجهل الشعب فيها بيقرر ينظم النسل من تلقاء نفسه كدة؟؟؟
عمركم شوفتوا حد متخلف بيفكر بعقله وبيعمل حساب لمستقبله عشان يفكر في مستقبل بلده؟

أنا مش ضد إعلانات التوعية.. بالعكس. لازم يكون فيه محاولات لتوعية الناس اللي عقلها على قده وتخليهم يربطوا الحالة المعيشية المتردية اللي بيعانوا منها بأسبابها الحقيقية، ومن ضمن الاسباب دي زيادة الخلفة. بس مش بالطريقة الغبية دي. أولا المشكلة مش في الدكتور ولا الآنسة الجامعية ولا الأستاذ اللي في المدينة.. المشكلة في القرى والثقافة الشعبية الشائعة فيها. الثقافة دي جذورها متشابكة مع معتقدات وعادات موروثة صعب تغييرها عن طريق المنطق والعقل. ناس فاضية، والستات هناك شغلتهم الأساسية هي إنهم يجيبوا عيال. لما يشوفوا بقى بسلامتها الوقفة المصرية بتاعة التليفزيون دي هيقفوا؟ دا أبو الهول ممكن يقف على حيله وهما لأ

مشاكل مصر كلها منبعها واحد.. مالهاش حل غير إننا نجيب أصل المشكلة من جذورها ونعالجه علاج قوي وفعال.. إنما طول ما احنا ماسكين في الاعراض الجانبية عمرنا ما هنوصل لحاجة وهيفضل حالنا واقف كدة.. مش محتاجين لا وقفة مصرية ولا مستوردة

البلاد النايمة، اللي بندلعها ونقول عليها نامية، كلها بتعاني من نفس المشكلة. البلاد اللي قررت تصحى من النوم عملت برامج جادة للسيطرة على الزيادة السكانية.. برامج فعالة مش شحاتة واستجداء من الناس. دا مصير بلد، مسألة نكون أو لا نكون. لو عايزين نكون يبقى تتطبق اجراءات صارمة تحد من زيادة النسل. زي برنامج الصين. الدولة تتكفل بطفل واحد لكل أسرة، هو اللي يستحق اللبن المدعم والتعليم الحكومي والرعاية الصحية المجانية. اللي عايز يخلف أكتر يبقى يصرف على عياله من جيبه.

الأزمة في مصر مش بحجم الأزمة في الصين طبعا، لكنها أزمة حقيقية. (مثال.. في ستينات القرن العشرين بلغ تعداد سكان كلا من مصر وكوريا الجنوبية 25 مليون نسمة.. اليوم تعداد مصر 78 مليون ، بينما تعداد كوريا 45 مليون.) هذه الأزمة تستوجب برنامج جاد وفعال مدعوم بقوانين حازمة تجبر المواطنين على تحمل مسؤليتهم تجاه المجتمع. يعني الدولة تتحمل الدعم لطفلين فقط لكل أسرة واللي عايز يخلف أكتر من كدة يتفضل يورينا شطارته. مش نقوله أصل الدنيا زحمة؟ دا آخر همه! ياخي اياكش تولع.. هو اللي بيخلف طابور عيال ده عارف يعني إيه واجب وطني ولا يعني إيه تنمية ولا يعني إيه اقتصاد؟ هتقعد تستعطفه بقى وتقوله إعمل وقفة؟ وقفة إيه؟ طب وقفة يا دكتور ماشي، مبلوعة.. لكن واقفة يا بلدينا؟ المفروض إنه هيسيب الفاس ويقف يفكر بقى ويحلل ويجيب احصائيات ويبص ع الموازنة العامة للدولة ويقول "ياه، دي الزيادة السكانية دي عائق كبير في طريق التنمية"؟؟!!

الأسطى وبلدينا شعارهم احييني انهاردة وموتني بكرة. ما بيشوفوش غير تحت رجليهم بالكتير، دا لو بصوا تحت رجليهم من أصله. دول لازم معاهم قوانين واجراءات. يا إما تعلمهم بقى.. وخد عندك يا حلو.. هتعيد نظام التعليم كله من أوله لآخره.. وعقبال ما ده يحصل هنكون وصلنا 120 مليون. وعقبال ما يجيب نتيجة هيكون مفيش مكان لحد يتعلم من أساسه

عايز توعي الناس، سيبك من الاعلانات الشيك دي، خليها للناس بتوع الباتون ساليه. إنزل بحملات توعية وسط الناس وروحلهم عقر دارهم وغير ثقافتهم. ضخ استثمارات واعمل مشروعات. خاطب عاداتهم وتقاليدهم الشعبية وبين تهافت منطقها. طور بيئتهم وخليهم يشتغلوا. ساعد بناتهم يتعلموا ويشتغلوا، مش فاتحلي دراعاتك للناس اللي بيرجعوا الستات لزمن الحرملك! طب ما الحرملك كان مليان عيال، عايز الستات يعملوا إيه في الحرملك غير إنهم يجيبوا عيال؟ فكرت تدرج المرأة بجد في الانتاج؟ ولا كل همك إنك تداري فشلك في خلق فرص عمل حقيقة تستوعب الجميع، وجاي على هواك أوي الغنيوة بتاعة "الست مالهاش إلا بيتها" عشان تريح دماغك من حق المرأة في إيجاد فرصة عمل؟

ما هو لو عايزين الناس تصدق إن فيه نية للاصلاح والتنمية يبقى لازم يكون فيه بشاير لده. ولا عايزين بعد التاريخ الطويل اللي انعدمت فيه ثقة الناس بالحكومة يستجيبوا كدة لحملات تنظيم الأسرة من غير ما يشوفوا أي كرامات للتنمية اللي انتم بتقولوا عليها؟

موضوع الرقص ع الحبل ده ماعدش ينفع. اعلانات الضرايب جابت نتيجة عشان قانون الضرايب اتغير، دا غير ان كل واحد كان متهرب من الضرايب كان ضميره واجعه لكن مضطر يتهرب في ظل القانون الغبي القديم اللي كان بيمص دمه، يبقى كان على إيه يروح للقضا برجليه؟ آه الاعلان كان جميل ودمه خفيف، لكن السبب الرئيسي اللي أدى للتغيير الجوهري كان تغيير القانون. إنما موضوع تنظيم الأسرة ده ما ينفعش بالاعلانات بس، لازم برنامج قوي متكامل وجاد. لازم كمان الارتقاء بمستوى التعليم وتشجيع المرأة على تحمل مسؤليتها تجاه المجتمع والاشتراك في عملية التنمية كعضو فاعل بها، مش ديكور وكلام بروباجندا عن تمكين المرأة وحقوق المرأة! حقوق مرأة إيه؟ إذا كانت المرأة لا تؤدي واجبها تجاه الوطن والمجتمع، يبقى هتاخد حقوق منين وفي مقابل إيه؟ غنيتوا علينا كتير بالاسطوانات إياها دي.. كفاية بقى. لو عايزنها جد يبقى لازم كله يكون جد

المرأة مش عايزة تمكين ولا زفت، المرأة عايزة تتحرر من القيود اللي مفروضة عليها واللي بتهمش دورها وبتحصره في وظائفها البيولوجية. المرأة محتاجة تحس إنها انسان له كيان وله قيمة وله مكان حقيقي داخل منظومة التنمية. من غير كدة هتفضل تجيب في عيال تشيلهم همها وترضعهم من فشلها واحساسها بالدونية وثقافتها السطحية وموروثاتها الشعبية. هتدفع المجتمع كله تمن جرايمه في حقها. هتتحول لقنبلة عنقودية، وبدل ما تبني هتهدم.

متهيألي مصر مش عايزة واقفة.. مصر عايزة زقة

زقة يا هندسة